Огъя исповедь кутске таӵе кылъёсын: «сьӧлыкамы пылатӥськон дыръя сӥзиськонмес утьымтэенымы». Нош мар со сыӵе пылатӥськон дыръя сӥзиськонэз утьытэк улон?

Со вера адямилэн христиан улонэн улымтэез сярысь. Храмамы мон ӵем вераськисько пылатӥськыны дасяськисьёсын но нырысь ик юасько соослэсь: «малы?». Та юан адямиослы малпаськон сётэ: зэмзэ но, малы кулэ пылатӥськон? Собере вераськон кутске но пумаз анай-атайёс но кирос анай-атайёс лушкемлык лэсьтон азьын лыкто исповеде но причащение.

Зэмзэ но, малы кулэ пылатӥськон? Та юанлы туж пӧртэм валэктонъёс сёто: «малы ке шуоно, мон ӟуч», «малы ке шуоно, ваньмыз пылатӥсько» (храме ке но ум ветлӥське), «медам висьы шуыса», «Кылчинлэн утетэз улын мед луом шуыса». Адямиослы валэктыны тыршисько, ми пылатӥськом адямиез, собере со храме мед ветлоз шуыса. Крещение — со духовной улонлэн пумыз ӧвӧл, кутсконэз гинэ.

«Религиозной минимумысь религиозной ӝуке»

Асьме кунын тросэз уло «религиозной минимумен»: ми асьмеос пылатӥськемын, соин ик нылпиосмес но пылатӥськом, пыр храме ветлӥськом: Крещение дыръя — вулы, нош Пасхае — курегпузлы. Причастие туж шер басьтӥськом, яке ноку но. Озьы ке но, тодметъёсты утиськом. Жаляса верано, сыӵе религиозной минимумлэн емышез религиозной ӝук луэ.

Священник луыса ужам дыръёсысьтым одӥг луэм учыр сярысь верало. Монэ ӧтизы улон интызэс югдытыны, малы ке шуоно, кулэм муртъёс, пе, вӧтато. Мон валэктӥ, югдытон — со вань шуг-секытъёсты быдтон амал ӧвӧл, но Инмарлэн бакель каронэз, но солэсь но тросгес кулэ аслыз адямилы югдытскыны: духовной улонэн улыны, исповедез ортчыны, причастие басьтыны. Но та пумысен югдур секыт вал. Трос аръёс ини адямиос уг ветло храме, причастие уг басьто.

Евангелиын вань Утисьмылэн таӵе паймымон кылъёсыз: Кин Монэн ӧвӧл, со Мыным пумит» (Мф.12:30). Та кылъёс возьмато, оскисьлы «огшоры» гинэ луыны уг луы шуыса, уг луы быдэстыны туала адямилэсь «туж умой но туж алама но ӧвӧл» улыны мылкыдзэ.

Бадӟым праздникъёс дыръя исповедьын ӵем кылыны луэ таӵе кылъёсты: «Мон номыр умойтэмзэ ӧй лэсьты: ӧй вийы, ӧй лушка». Но ӟечсэ но номыр ӧд лэсьты! Нош тон уго пылатӥськем адями, Крещение нош культуралэн тодметэз ӧвӧл, со «музъемлэн сылалэз» луон (Мф.5:13).

Христосэн ӧвӧл ке асьмеос, Солэсь интызэ туж ӝог Пумитъяськись басьтэ. Со адямиослэн корказы пӧртэм удысысь туж трос языческой макеос ошылэмын вал. Шундыӝужанысь «коньдон писпу», киязы горд языческой синьысъёс, «Фатималэн синмыз», чертополохлэн вайез но асьмелэн славян язычествомы: кӧня ке коркакузёос, дуретъёс но ӵужиськонъёс. Та коркаез югдытон йылпумъяськиз вань языческой тодметъёсты — макеосты коркась сэрпалтонэн но кузёоссэ исповедь пыр поттонэн. Тӥни сыӵе ӝук пӧзе асьме адямиослэн йыръёсазы, кудъёсыз номыр но валатэк пылатӥськонэз ортчизы.

Кышкан но куалекъян

Малы ХХI даурын пылатӥськем, дышетскем адями ас корказэ тырмытэ утиськон макеосын, пелляськись песяйёс доры ветлэ, гороскопъёсты кылзэ но сюлмысьтыз учке «экстрасенсъёслэсь ожмаськонъёссэс»? Кышкаменыз. Жан-Поль Сартр атеистлэн ымпушказ Кузё-Инмар понӥз паймымон, ас сяменыз христиан кылъёсты: «адямилэн лулаз Инмар быдӟа пасез вань, но котькудӥз сое тырмытэ озьы, кызьы быгатэ». Инмарез утчан котькудӥзлы понэмын, со сярысь трос визьмо адямиос веразы, Тертуллиан бордысен кутскыса, кудӥз шуиз: «лул-со христиан», Сартр атеистэн йылпумъяса. Научно-технической прогресс шоры учкытэк, адями пумиське сыӵе арбериосын, кудзэ уг быгаты воштыны но валэктыны но, соин ик, кышка соослэсь. Кылсярысь, кулон, матысь адямиедлэн секыт висёнэз, шимучыръёс, инкуазь бугыръяськонъёс но ваньмыз мукетыз, кудзэ ӧз быгаты вормыны нокыӵе научно-технической прогресс. Оскись адями тодэ, ваньмыз Инмар киын шуыса: «Тӥляд нош йыр вылысьтыды йырсиды но лыдъямын, эн кышкалэ ук» (Мф.10:30-31). Ас улонад Инмарлэсь эриксэ шӧдон но, ваньмыз, мар луэ улонад, ӟечен гинэ берыктӥське шуыса оскон потэ быдэсак Инмарен улон бордысь. Нош Соин матысь луыны асьмеос быгатом вань улонамы Сое пыртыса: Черке ветлыса но Солэн Таинствоосаз пыриськыса, тужгес но Причастие басьтыса. Ӧвӧл ке улонын сыӵе адямиез но Инмарез герӟась синьысэз, соку со «лулыныз» гинэ оске но, кышкан вуыку, «лулызлэсь пасьсэ» маин сюрем ворсаны тырше. Соку ини уже кутӥсько пӧртэм утетъёс, талисманъёс, гороскопъёс но турлы мукет сьӧд перилэн ужъёсыз.

Адямилы Христосэз дэмлано

Таӵе югдурлэн одӥгез бадӟым мугез со бордын, туала адями лулмугор куронъёсызлы гинэ тэрытскыса улыны дышемын бере, Черкез но «духовной супермаркетэз» кадь адӟе, кытысь озьы ик ас кулэяськонъёссэ тырмытон гинэ утча. Ми ум бырйиське калыкез, кудӥз лыктэ храме, милемлы со сётэмын ӧвӧл. Но ми быгатӥськом мукетсэ — валэктыны со адямиослы, малы кулэ пылатӥськон но мар кароно собере.

Патриарх Кирилл но огпол гинэ ӧз вера ни адямиосты Крещенилы дасян ужез выльдон сярысь. Черкын Крещение пыр потэмлэсь азьвыл, адямилы катехизациез ортчыны кулэ. Умой луысал, чинопоследованиез лэсьтэмлэсь одӥг нуналлы азьвыл, яке со нуналаз гинэ ӧвӧл, но со адямиосын кык-куинь ке но валэктон уж нуыны. Сыӵе валэктонъёс тӥясалзы адямилэсь Православие сярысь языческой валанъёссэ но возьматысалзы солы духовной улонлэсь вань дун-сьӧлыктэмзэ но юрттысалзы адямилы Христосэз шедьтыны. Куке адями духовной улонэн улыны кутске, соку пӧечи оскон, туно-пеллёос дортӥ ветлон но гороскопъёсын тунсыкъяськон ачиз улонысь кошке. Уго, Христосэн ке ми, малы кулэ на мар ке но мукетыз?

#Миссионерское_служение