Москва но Ӟуч кунлэн Святейший Патриархезлэн КИРИЛЛЭН нылпиосты утён Калыккуспо нунал пумысен Вазиськонэз

Преосвященной архипастырьёс, всечестной пресвитеръёс но диаконъёс, Христос пушкын дуно агай-вынъёс но сузэръёс!

1 инвожое асьмеос пусйиськом нылпиосты утёнъя Калыккуспо нуналэз. Та лыдпус котькудмылы тодамы вайытэ будӥсь пиналъёсмы сярысь сюлмаськонлэн кулэлыкез сярысь, тужгес но соос сярысь, кинлэн улонэз асьмелэн юрттэтэнымы герӟаськемын.

Кузё-Инмар асьмелы кельтӥз матысьтэ яратон сярысь курон-косонзэ, кудӥзъя улыны кулэ котькуд христианин, но та курон-косон асьмеды гажась-жалясесь но ог-огмес шӧдисесь луыны косэ. Котькуд адями утча саклыко но ӟеч кусып возёнэз, но тужгес соин кулэясько нылпиос. Асьмеос кыл кутӥськомы нылпиосмы сярысь сюлмаськыны но утьыны соосты, уго Ачиз Утисьмы но шуэ: «Кин пиналэз Мынам Нимы понна кабыл басьтоз, со Монэ кабыл басьтоз» (Мф.18:5).

Жаляса верано, туннэ туж трос нылпиослы югыт дунне вылэ но потыны луонлык уг сёто, но ваньмыз со лэсьтӥське адямилэн урод эрикезъя. Асьмелы верамын ӧвӧл ке шат Христослэн таӵе кышкыт алонъёсыз: «Нош кин одӥгзэ та пичиос пӧлысь, Мыным оскисез, сьӧлыке пыртӥз ке, солы умойгес луысал, чыртыяз вуко кӧ ошыса, зарезь пытсы выйытысалзы ке» Мф.18:6).

Котькуд ар асьме кунын анай кӧтпушкын сю сюрс нылпиосты виё, со лыдпус олокӧня каръёсын улӥсь калыклэн лыдпусэз дорозь вуэ. Со зэмзэ но огъя национальной шимучыр луэ — нравственной но, демографической но. Асьмелы кулэ лэсьтыны ваньзэ, анай луыны дасясь кись кышномурт, кудӥз сылэ нылпизэ куштон сярысь быръён азьын, медаз лэсьты сое шуыса. Со понна секыт улон югдуръёсы сюрем кышномуртъёслы одно ик кулэ психологической но материальной юрттэт сётыны. Кызьы асьмеос валамы Инмарлэсь яратон законзэ, озьы ик быгатом вазиськыны мурт кайгу пумысен. Кинлэн ке но улонэз герӟаськемын асьмелэн Христослы адӟемкарымон улонэнымы.

Туннэ мон котькуддэс ӧтисько нылпи возьмась кышномуртъёслы юрттэт сётонъя огъя Черк уже пыриськыны. Вуоно анайёс мед шӧдозы, соос огназы кельтэмын ӧвӧл, соос понна сюлмасько, соослы улон инты но мукет юрттэт сётозы шуыса.

Тӥляд гажан-жалянды Кузё-Инмарлы ярамон но адямиос понна пайдаё мед луоз.

+ КИРИЛЛ

МОСКВА НО ӞУЧ КУНЛЭН ПАТРИАРХЕЗ

 

Добавить комментарий

Ваш e-mail не будет опубликован. Обязательные поля помечены *